Magnús Ingi: Gefumst ekki upp

Magnús Ingi Einarsson, fyrirliði Fjölnis, segir að sínir menn neiti að gefast upp þó svo að útlitið sé dökkt fyrir framhaldið í fallbaráttunni í Pepsi-deild karla.

Fjölnir gerði í dag 2-2 jafntefli við Fylki á útivelli en jöfnunarmark Fjölnis kom á lokamínútu venjulegs leiktíma.

„Úr því sem komið var var gott að ná að jafna leikinn fyrir rest. En mér fannst við heilt yfir sterkari aðilinn í leiknum og vorum klaufar að koma okkur ekki í þá stöðu að vinna leikinn," sagði Magnús.

Fyrra mark Fjölnis skoraði Ingimundur Níels Óskarsson en hann leikur reyndar með Fylki. Hann er þó fyrrum leikmaður Fjölnis. „Hann er ekki óvanur því að skora fyrir Fjölni þannig að þetta var ágætt," sagði hann í gamansömum tón.

Fjölnir á erfiða baráttu fyrir höndum í fallbaráttunni. „Það hefði munað miklu að fá þrjú stig í dag en það eru enn tólf stig í pottinum. Við erum enn á lífi og þannig viljum við hafa stöðuna eftir næsta leik. Og þannig koll af kolli."