Tólf ára gömul stúlka lést af barnsförum

Tólf ára gömul stúlka frá Jemen lést eftir að hún hafði reynt í þrjá daga að fæða barn. Stúlkan var gift 24 ára gömlum manni frá Saudi - Arabíu.

Stúlkan, sem heitir Fawziya Abdullah Youssef, lést á föstudaginn eftir miklar blæðingar, en barnið sem hún reyndi að ala var andvana. Stúlkan lá á spítala í Hodeida héraðinu, um það bil 200 kílómetrum frá Sana´a höfuðborg Jemen þegar hún lést.

Danska blaðið Jyllands Posten segir að andlátið veki spurningar um hjónabönd barna sem tíðkast enn víða í Jemen. Stúlkan var einungis 11 ára gömul þegar hún giftist hinum 24 ára gamla manni frá Saudi Arabíu. Þrátt fyrir að kvenfrelsissamtök og mannréttindasamtök berjist fyrir því að lágmarksaldur verði settur um hjónabönd hefur ekki enn tekist að fá þingið til að samþykkja slík lög.

Töluvert var rætt um barnahjónabönd í Jemen í fyrra þegar ung stúlka, Nujood Ali, stakk af frá eiginmanni sínum og óskaði eftir skilnaði.