Ríkið miklu nískara á auðlindagjald

Formaður bæjarráðs Reykjanesbæjar fullyrðir að ríkið greiði minna fyrir afnotagjald af auðlindum, en Reykjanesbær fái fyrir auðlindir á Reykjanesi.

Katrín Júlíusdóttir, iðnaðarráðherra gagnrýndi í kvöldfréttum Stöðvar tvö, samning sem Reykjanesbær og HS orka, gerðu um auðlindanýtingu á Reykjanesi og vill láta endurskoða hann. Samningurinn er til 65 ára með möguleika á framlengingu. Þá borgar fyrirtækið Reykjanesbæ auðlindagjald.

Böðvar Jónsson, formaður bæjarráðs í Reykjanesbæ, gagnrýnir ráðherrann og segir að lög sem samningurinn byggir á, hafi verið sett meðan iðnaðarráðherra var formaður iðnaðarnefndar. Eigi að stytta gildistíma auðlindasamningsins þá geti það haft í för með sér að fyrirtæki vilji ná meiri arði á skemmri tíma. Að öðrum kosti geti styttri gildistími einnig komið í veg fyrir fjárfestingar.

Böðvar segir að auðlindagjaldið á Suðurnesjum nemi líklega 2,5% að verðmæti orkunnar sem framleitt sé þar. „Ég veit að það er er mun hærra en ríkið er sjálft að greiða landeigendum, til dæmis í vatnsaflsvirkjunum."

Böðvar segir undarlegt að ríkið gagnrýni samninga Reykjanesbæjar þegar þess eigin samningar séu bæði til lengri tíma og fyrir lægri gjald.