Massacci á leið til United

Alberto Massacci, sextán ára bakvörður hjá ítalska liðinu Empoli, segist vera á leið til Manchester United. Hann er ekki byrjaður að leika með aðalliði Empoli en er talið mikið efni.

Fram kemur í enskum fjölmiðlum að Massacci hafi þegar staðist læknisskoðun á Old Trafford og gengið verði frá samningi hans á morgun.

Manchester United hefur áður verið gagnrýnt fyrir að fá unga ítalska leikmenn áður en þeir mega gera samninga við sín uppeldisfélög. Má þar nefna Federico Macheda og Guiseppe Rossi.