Tónelskur þjófur stal harmonikku af Amiinu

„Við vorum búin að færa allar okkar græjur yfir á Grundarstíginn og vorum að æfa okkur fyrir tónleikaferð til London. Svo var bara brotist inn í húsnæðið um páskahelgina og rauðri harmónikku og rafmagnsfiðlu stolið,“ segir María Huld Markan Sigfúsdóttir, ein af liðsmönnum Amiinu. Hljómsveitin varð fyrir áfalli þegar tónelskur þjófur fór á kreik og lét greipar sópa í æfingahúsnæði sveitarinnar.

María viðurkennir að góssið sem ræninginn hafði með sér á brott hafi ekki alveg verið í takt við það sem hún bjóst við, því allt í kringum hljóðfærin voru græjur sem auðveldlega hefði verið hægt að koma í verð.

María upplýsir að fiðlan hafi komið fljótlega í leitirnar því glöggur vegfarandi kom auga á hana í blómabeði við Bergstaðastræti. María vonar því heitt og innilega að þjófurinn hafi fljótlega uppgötvað að hann hefði lítil not fyrir harmónikkuna og skilið hana eftir á svipuðum stað.

„Mig langar því bara að biðja fólk sem nú er að fara í vorhreingerningar í görðunum sínum að hafa augun hjá sér og láta okkur vita ef það rekst á meðalstóra, sjö­tíubassa harmónikku.“ Þess ber að geta að fiðlunni varð ekki meint af blómabeðsblundinum sínum og María telur víst að harmónikkan ætti að geta komist klakklaust frá slíkri dvöl finnist hún fljótlega.

Atvikið var tilkynnt strax til lögreglunnar sem nú fer með rannsókn málsins. María er þess þó fullviss að tónelski þjófurinn sjái að sér og skili hljóðfærinu. „Við erum alveg reiðubúnar til að greiða smá lausnargjald,“ segir María en Hohner-harmónikkan er síður en svo ódýr þótt tónlistarkonan vilji ekki gefa upp hvað hún kosti ný út úr búð. „Maður fer allavega ekki og kaupir sér nýja upp úr þurru,“ útskýrir María.

Þær Amiinu-stelpur eru á fullu við að undirbúa tónleikaferðalag til London þar sem þær spila ásamt Valgeiri Sigurðssyni og Shlomo. Þær koma síðan fram á stofutónleikum á vegum Listahátíðar í Reykjavík en þeir tónleikar fara einmitt fram í æfingarhúsnæðinu við Grundarstíg þar sem músíkalski ræninginnn stóðst ekki freistinguna.

freyrgigja@frettabladid.is