Útlendingar í fasteignafjötrum

Fjöldi útlendinga sem vilja flytja úr landi leitar aðstoðar hjá starfsmönnum Alþjóðahúss þar sem þeir eru bundnir af eignum sínum hérlendis sem þeir geta hvorki selt né leigt.

„Sumir vilja bara skila lyklunum og fara,“ segir Margrét Steinarsdóttir, framkvæmdastjóri og lögfræðingur Alþjóðahúss. Hún segir að frá áramótum hafi oft um tíu manns leitað til þeirra í viku hverri vegna slíkra vandamála.

Eins segir hún marga hafa leitað til þeirra þar sem leigusalar hafi ekki viljað endurgreiða þeim trygginguna þó engar forsendur séu fyrir því að halda henni. „Ég man eftir vel á annan tug slíkra tilfella sem er nú kannski ekki svo hátt hlutfall en það eru greinilega alltaf einhverjir sem vilja nýta sér erfiða stöðu annarra,“ segir hún.

Hún segir einnig mörg dæmi þess að útlendingar leiti til þeirra þar sem þeir vilji vera hér áfram en geti ekki lengur greitt afborganir af húsum sínum.

En kreppan hefur einnig haft jákvæð áhrif á hag sumra. Til dæmis var nokkuð um það í góðærinu að fólk borgaði hátt leiguverð jafnvel fyrir lítil herbergi en ekkert ber á slíkri okurleigu, eins og Margrét kallar það, nú þegar keppst er um leigjendur á markaðnum.- jse