Logi: Verður sögulegt mark

Logi Ólafsson, þjálfari KR, segir að hann hafi lengi beðið eftir rétta tækifærinu að leyfa hinum sextán ára gamla Ingólfi Sigurðssyni að spreyta sig með KR.

Ingólfur kom inn á sem varamaður í leik KR gegn ÍBV í kvöld og aðeins fimm mínútum eftir að hann kom inn á skoraði hann sitt fyrsta mark fyrir meistaraflokk félagsins. Um leið innsiglaði hann 3-0 sigur KR á ÍBV.

„Það verður að bíða eftir rétta tímapunktinum og höfum ég og Pétur (Pétursson, aðstoðarþjálfari) lengi beðið eftir því að gefa honum tækifæri. Við vildum ekki gera það nema að við töldum aðstæðurnar réttar fyrir hann. Okkar menn hafa oft komið leikjunum þannig fyrir að það hefur ekki verið hægt að ookkar mati."

„En Ingólfur er einn af efnilegustu leikmönnum landsins og gaman að sjá hann spila í dag. Hann var mikið í boltanum og skoraði. Ég held að þetta verði sögulegt mark. Hann er það góður og efnilegur að það hlýtur að vera skráð á spjöld sögunnar þegar hann skorar í sínum fyrsta leik."