Óþarfi að slá alla umræðu út af borðinu

„Það sem við erum að reyna að gera er að velta upp mögulegum leiðum að lausnum,“ segir Finnur Oddsson, framkvæmdastjóri Viðskiptaráðs Íslands, um þá hugmynd að lífeyrissjóðirnir komi að lausn Icesave-deilunnar með láni til ríkisins.

Finnur segist ekki vilja deila við Hrafn Magnússon, framkvæmdastjóra Landssambands lífeyrissjóða, heldur velta upp hugmyndum að mögulegri þátttöku lífeyrissjóðanna í því endurreisnarstarfi sem fram undan sé.

Í Fréttablaðinu í gær sagði Hrafn að hugmynd Viðskiptaráðs væri „alveg galin“. Hann sagði að hugmyndin þýddi að það yrði gegnumstreymi í lífeyrissjóðunum, áhættan myndi stóraukast og mögulega þyrfti að skerða réttindi sjóðsfélaga. Raunveruleg hætta yrði á því að lífeyrissjóðirnir yrðu þjóðnýttir. Þá skipti miklu fyrir lífeyrissjóðina að vera með hluta eigna sinna erlendis.

„Það er óþarfi að slá alla umræðu út af borðinu,“ segir Finnur. „Við tökum fram að þetta dregur úr áhættudreifingu lífeyrissjóðanna. Í þessari aðgerð þarf ekki endilega að felast einhver breyting á því að hluti eignanna verði raunverulega erlendur þar sem eignasafn Landsbankans er erlent eignasafn. Það yrði lagt til grundvallar við endurheimtur þessa láns. Það er ekkert sem kemur í veg fyrir að lífeyrissjóðirnir fái safnið á sanngjörnu verði og sjái síðan sjálfir um að hámarka virði þess.“

Finnur segist ekki sjá að með þessu verði lífeyrissjóðunum breytt í gegnumstreymiskerfi. „Þetta er ekki breyting í þá átt frekar en kaup lífeyrissjóðanna á ríkisskuldabréfum og skuldabréfum Íbúðalánasjóðs.“

„Aðalatriðið er að í þessu óhefðbundna ástandi opnum við á umræðu um óhefðbundnar leiðir. Það er ekkert sem hefur komið fram sem sýnir fram á að þessi leið sé ekki þess virði að skoða hana.“

Ólafi Ísleifssyni, lektor í hagfræði við Háskólann í Reykjavík, líst ekki vel á hugmynd Viðskiptaráðs. „Þetta er mjög varhugavert,“ segir Ólafur. „Sjóðirnir þurfa að gæta hagsmuna sinna sjóðsfélaga. Það sem varð þeim til bjargar voru þeirra erlendu eignir sem eru þeim ákveðið haldreipi.“

trausti@frettabladid.is