Heildaafli á föstu verði eykst um 27 prósent

Heildarafli íslenskra skipa í nýliðnum febrúarmánuði, metinn á föstu verði, var 27 prósent meiri en í febrúar 2008. Aflinn nam alls 99.648 tonnum í febrúar 2009 samanborið við 85.808 tonn í sama mánuði árið áður. Þetta kemur fram á heimasíðu Hagstofunnar. Þar segir einnig að Botnfiskafli hafi aukist um tæp 1.900 tonn frá febrúar 2008 og nam 43.100 tonnum. Þorskafli jókst um rúm 3.000 tonn og karfaaflinn um rúm 2.300 tonn. „Ýsuaflinn dróst hins vegar saman um 3.200 tonn og ufsaaflinn um 2.000 tonn samanborið við febrúar 2008," segir einnig.

Í tölum Hagstofunnar kemur fram að afli uppsjávartegunda hafi numið rúmum 54.000 tonnum sem er um 11.100 tonnum meiri afli en í febrúar 2008. Hagstofumenn segja að aukningu í uppsjávarafla megi rekja til þess að þrátt fyrir um helmingi minni loðnuveiði en árið áður og um 11.000 tonnum minni afla af kolmunna, þá veiddust í nýliðnum febrúarmánuði 28.000 tonn af gulldeplu.

Síldarafli var einnig um 10.200 tonn, en engin síld var veidd í febrúar 2008. Flatfiskaflinn var rúm 2.000 tonn í febrúar og jókst um rúmlega 700 tonn frá fyrra ári. Skel- og krabbadýraafli var 61 tonn samanborið við 46 tonna afla í febrúar 2008.

„Afli á föstu verði er reiknaður út til þess að finna breytingu á verðmæti heildaraflans að gefinni þeirri forsendu að verðhlutföll milli einstakra fisktegunda séu þau sömu og á ákveðnu viðmiðunarári sem hér er árið 2004. Hér er því um að ræða hliðstæðu við umreikning á afla yfir í þorskígildi. Aflinn í tonnum sýnir hins vegar magn aflans án tillits til þess að fisktegundir eru misjafnlega verðmætar," segir Hagstofan.



Nánar má kynna sér málið hér.