Ólafur Þórðarson: Þurfum að halda haus

Ólafur Þórðarson þjálfari Fylkis gat leyft sér að brosa lítillega eftir sigurinn á Grindavík í kvöld þó hann sé ekki tilbúinn að fagna þriðja sætinu strax.

"Frábær þrjú stig eins og öll þrjú stig. Þessir strákar hafa sýnt mikinn karakter í allt sumar. Það eru tveir leikir þar sem það hefur vantað, gegn Breiðabliki og Fjölni. Þá vorum líka í djúpum skít en burt séð frá því hafa strákarnir sýnt gríðarlegan karakter og gerðu það í kvöld líka," sagði Ólafur.

"Við verðum að halda haus og vera einbeittir á meðan þetta er ekki enn öruggt. Það eru níu stig í pottinum, KR er á undan okkur og við gerum allt sem við getum til að komast eins hátt og við getum."

"Mér fannst þetta að mörgu leyti ágætisleikur. Grindvíkingar voru ekki að spila vel í fyrri hálfleik en léku betur í seinni. Mér fannst við vera betri í fyrri hálfleik en leikurinn var klárlega betri í seinni hálfleik. Miklu skemmtilegri," sagði Ólafur að lokum.