Heimspressan hefur sýnt hvalveiðunum lítinn áhuga

Áhyggjur stjórnvalda og hagsmunaaðila í útflutningi og ferðaþjónustu af áhrifum stórtækra hvalveiða hér við land í sumar virðast hafa verið óþarfar. Ráðuneytum hafa borist sárafá erindi og fjölmiðlar sýna hvalveiðum lítinn áhuga.

Sigurgeir Þorgeirsson, ráðuneytisstjóri sjávarútvegs- og landbúnaðarráðuneytisins, segir að í vor og vetur hafi hagsmunaaðilar komið á framfæri mótmælum við ráðuneytið. „Ég kannast hins vegar ekki við að neinar sérstakar kvartanir eða ábendingar hafi borist eftir að veiðarnar hófust. Það væri líka miklar ýkjur að segja að heimspressan hafi sýnt þessu áhuga. Við höfum ekki orðið varir við neinn slíkan hávaða."

Sigurgeir segir að á fundi Alþjóðahvalveiðiráðsins í vor hafi hvalveiðar Íslendinga aldrei borist í tal. „Á þetta var hvorki minnst formlega né í ræðustól, né var rætt um þetta við okkar fulltrúa þar. Íslensku hvalveiðarnar voru þar einfaldlega ekki á dagsskrá."

Hagfræðistofnun Háskóla Íslands vinnur nú að athugun á efnahagslegum áhrifum hvalveiðanna. Hluti af þeirri vinnu er að hafa samband við hagsmuna­aðila og fá skýra mynd af kostum og göllum við veiðarnar.

Erna Hauksdóttir, framkvæmdastjóri Samtaka ferðaþjónustunnar, telur að hvalveiðarnar veki litla athygli erlendra fjölmiðla vegna þess að málefni efnahagshrunsins einoki umræðuna. „En við höfum sagt að við eigum ekki að rugga bátnum með þessum veiðum, það sé ekki þess virði." Í áliti samtakanna til sjávarútvegsráðuneytisins í vetur segir að ef Íslendingar hefja stórfelldar veiðar á langreyði mun heimspressan mæta hingað og gera íslenskri ferðaþjónustu og útflutningi erfitt fyrir.

Benedikt Sveinsson, framkvæmdastjóri Iceland Seafood International, segir að óþægindin, sem almennt voru talin fyrirsjáan­leg, hafi orðið lítil sem engin. „Þetta hefur ekkert truflað okkur."

svavar@frettabladid.is