Spyr Steingrím um kostnað ríkisins vegna launaálags formanna

„Það voru miklar umræður um eftirlaunafrumvarpið á sínum tíma og ég tel eðlilegt að það sé dregið fram hverjir það eru sem fengið hafa greitt og hversu mikið," segir Jón Gunnarsson, þingmaður Sjálfstæðisflokksins, en hann hefur lagt fram á Alþingis fyrirspurn þess efnis til Steingríms J. Sigfússonar, fjármálaráðherra.

Eftirlaunalögin umdeildu voru samþykkt í desember árið 2003 en með þeim var æðstu embættismönnum tryggð betri lífeyriskjör en almenningi. Í lögunum var formönnum stjórnmálaflokka, sem jafnframt eru ekki ráðherrar, tryggð 50% launaálag á þingfararkaup en það er 520 þúsund krónur á mánuði. Formenn stjórnarandstöðuflokka eru því með 780 þúsund króna grunnlaun.

Jón segist ekki vera að gagnrýna þessar aukagreiðslur til formannanna. Greiðslurnar séu með öllu réttlætanlegar því hugsunin hafi verið að jafna stöðuna á milli formanna stjórnarandstöðuflokka og stjórnarflokka.

„En það var alltaf talað um þetta frumvarp sem einhvern bastarð og að þetta hafi verið keyrt sérstaklega í gegn til að auka eftirlaunaréttindi ákveðna ráðherra. Mér fannst þessi þáttur gleymast svolítið í þeirri umræðu," segir Jón. Eðlilegt væri því að fá skjalfest hverjir það eru sem fengið hafa þessar greiðslur, og þá hversu háar, í ljósi gagnrýni ákveðna þingmanna á sínum tíma.