Logi Ólafsson: Erum í hatrammri baráttu um annað sætið.

Logi Ólafsson var mjög ánægður með að hafa sótt þrjú stig til Keflavíkur í dag en skilur ekki hvernig liðið fékk á sig þrjár vítaspyrnur í leiknum.

"Þetta er strákur sem ver U-21 árs lið Norðmanna og ég þekki þjálfara þess liðs mjög vel. Ég þekki menn hjá Lilleström mjög vel líka þannig að við treystum þeim meðmælum sem hann fékk og hann er að komast betur og betur inn þetta hjá okkur. Hann varði þessi víti mjög örugglega, las þetta eins og opna bók," sagði Logi um norska lánsmarkvörðinn í marki KR sem varði tvö víti í leiknum.

"Við vorum mjög slakir í fyrri hálfleik og féllum í þá gryfju að reyna sífellt í einhverri þráhyggju stutt spil inni á miðjunni þar sem við misstum boltann þar sem við vorum að reyna þessar sendingar sem í ofanílag voru lélegar. Þess vegna gekk þetta ekki upp í fyrri hálfleik."

"Menn áttuðu sig á því í seinni hálfleik að það væri hægt að spila þetta með öðrum hætti. Mér fannst við vera með þennan leik í höndunum eftir mörkin og mér fannst þeir ekki skapa mikla hættur. Það er nokkuð merkilegt að þeir skuli fá á okkur dæmdar þrjár vítaspyrnur í einum og sama leiknum. Ég hlakka til að skoða þetta."

"Mér fannst vítin í seinni hálfleik vafasöm en dómararnir eru að reyna sitt besta og ég ætla ekki að dæma um það. Ég er ánægður með að hafa unnið leikinn."

FH tapaði illa á heimavelli í dag og ef KR vinnur sinn leik munar sjö stigum á liðunum en er þetta of lítið of seint? "Ég geri fastlega ráð fyrir því já. Ég held að FH taki sig saman í andlitinu eftir þennan leik og glutri þessu ekki niður en við erum í hatrammri baráttu um annað sætið og þurfum að leggja okkur alla fram í þeim leikjum sem eftir eru," sagði Logi að lokum.