Hæsti maður heims á leið til Íslands

Von er á hæsta núlifandi manni heims, Sultan Kosen, hingað til lands í lok næstu viku í tilefni af útkomu á nýjustu heimsmetabók Guinnes. Sultan var útnefndur hæsti maður heims fyrir skömmu en hann er rétt tæpir tveir og hálfur metrar á hæð. Sultan er frá Tyrklandi.

Hendurnar, frá úlnlið fram á fingurgóma mælast tæplega 28 sentimetrar og fæturnir mælast tæplega 37 sentimetrar sem þýðir að Kosen notar skóstærð í kringum 60.

Kosen er 10 sentimetrum hærri en fyrrum hæsti maður í heimi, Kínverjinn Bao Xishun.