Pepsi-deild karla: Falla Þróttarar í kvöld?

19. umferð Pepsi-deildar karla klárast í kvöld með þremur leikjum sem hefjast allir kl. 18.

Flestra augu verða á Valbjarnarvelli þar sem Íslandsmeistarar FH mæta í heimsókn til Þróttara sem eru með bakið upp við vegg og dugir ekkert nema sigur til þess að halda á lífi möguleikanum á að bjarga sér frá falli.

FH-ingar geta aftur á móti stigið stórt skref í átt að því að verja titil sinn með sigri í leiknum.

Fylkismenn geta tölfræðilega séð enn náð FH-ingum þó svo að það verði að teljast ólíklegt að það gerist þá er liðið samt sem áður í harðri baráttu um að lenda í öðru sæti deildarinnar.

Fylkir mætir Grindavík á Grindavíkurvelli en Grindvíkingar geta endanlega losað sig við falldrauginn með sigri í kvöld.

Þá mætast Stjarnan og Breiðablik á Stjörnuvelli en liðin eru á svipuðu reki um miðja deild en það er stutt upp í 4. sætið og einnig stutt niður í 10. sætið þannig að leikurinn er mikilvægur fyrir bæði lið.

Nýliðar Stjörnunnar geta í sjálfu sér vel við unað í sumar að hafa aldrei verið í fallbaráttunni en Blikar eru eflaust minnugir síðasta sumars þegar liðið hrundi niður stigatöfluna á lokasprettinum eftir gott gengi framan af sumri og vilja ekki láta það endurtaka sig nú.

Leikir kvöldsins:

Þróttur-FH á Valbjarnarvelli

Stjarnan-Breiðablik á Stjörnuvelli

Grindavík-Fylkir á Grindavíkurvelli