Beckham aftur í rifrildi við stuðningsmann LA Galaxy

Endurkoma stórstjörnunnar David Beckham í MLS-deildina ætlar ekki að vera neinn dans á rósum en hann var sem kunnugt er sektaður af stjórn bandarísku deildarinnar fyrir að rífast við og ögra stuðningsmanni LA Galaxy sem svívirti hann í æfingarleik félagsins við AC Milan fyrir viku síðan.

Hinn 34 ára gamli Beckham endurtók leikinn í leik gegn Kansas City Wizards um helgina en leikmaðurinn brást þá illur við þegar einn stuðningsmaður íklæddur ensku landsliðstreyjunni ku hafa svívirt eiginkonu hans, Victoriu Beckham.

„Hann ætti ekki að fá að klæðast þessarri treyju eftir það sem hann sagði um eiginkonum mína. Þetta var svívirðilegt og þess vegna svaraði ég honum fullum hálsi. Ég er vanur því að stuðningsmenn bölvi og blóti manni en ég hef ekki heyrt aðrar eins svívirðingar í langan tíma.

Flestir stuðningsmenn voru þó að hvetja mig og ég fékk meira að segja góðar viðtökur frá stuðningsmönnum Kansas City og það er jákvætt. Það var aðeins lítill hópur af stuðningsmönnum LA Galaxy sem var með einhver leiðindi og það er auðvitað svekkjandi en svona er þetta stundum," útskýrir Beckham í samtali við ESPN fréttastofuna.

Beckham hefur átt í vök að verjast undanfarið gegn reiðum stuðningsmönnum LA Galaxy sem finnst hann hafa svikið félagið með því að hafa farið á láni til AC Milan á síðustu leiktíð.