Sam­mála mati Finns: „Börn eiga að fá að vera börn“

Hinn 16 ára gamli Atli Freyr Haraldsson Katrínarson fór á kostum í sínum fyrsta leik í Bónus-deildinni og skoraði 18 stig, hitti úr öllum þremur þriggja stiga skotum sínum, tók flest fráköst allra á vellinum eða 12 og skilaði langflestum framlagspunktum eða 27, í 90-77 sigri Vals á Stjörnunni.

„Þetta var það sem ég vonaði fyrir hönd Valsmanna því það er komið svolítið langt síðan uppalinn Valsari hefur verið á háu stigi. Þessi strákur er bara frábær,“ sagði Hlynur Bæringsson í Körfuboltakvöldi á föstudaginn en umræðuna má sjá hér að neðan.

Hlynur hefur fylgst vel með Atla Frey í yngri flokkum og nefndi hann sérstaklega í upphitunarþætti fyrir deildina. Atli náði samt að koma honum á óvart:

„Hann hefur gríðarlega margt. Ég er auðvitað ekki að segja að hann fari í gegnum tímabilið án þess að klikka á skoti en hann er með góða boltatækni, líkamlega tilbúinn og líka, fyrir utan fyrstu mínúturnar, að taka þessa fullorðnu karlmenn í Stjörnunni og halda sínu varnarlega. Það er það sem ég hélt að yrði mögulega vandamálið hans en það var ekki og þessi strákur er gríðarlega öflugur,“ sagði Hlynur.

Minnti Benedikt á Ölla heitinn

Atli Freyr, sem í sigrinum á Stjörnunni var 16 ára og 178 daga, er einn sá yngsti í sögunni til að ná að skora 18 stig í einum leik í úrvalsdeild karla. Hann er líka einn sá yngsti sem nær að skora að minnsta kosti 10 stig og taka að minnsta kosti 10 fráköst í einum leik í úrvalsdeild karla.

Benedikt Guðmundsson hefur verið afar lengi í bransanum en er einhver unglingur sem hefur komið af viðlíka krafti inn í deildina?

„Örlygur Sturluson kemur fyrst upp í hugann. Kom upp með þvílíkum látum og leiddi bara Njarðvík til Íslandsmeistaratitils það ár.

Hann er ofboðslega flottur og efnilegur en við værum að ljúga ef við segðumst hafa átt von á þessari frammistöðu,“ sagði Benedikt.

Liggur ekkert á að koma grunnskóla­krökkum í meistara­flokk

Atli Freyr var frábær með U16-landsliði Íslands í sumar en hann spilaði síðasta vetur með 11. flokki í stað þess að fá eitthvað hlutverk í meistaraflokki. Finnur Freyr Stefánsson þjálfari Vals segir það hafa verið meðvitaða ákvörðun að halda Atla utan við meistaraflokk.

Hlynur sagði alltaf erfitt að meta hvenær rétt væri að hleypa mönnum inn í meistaraflokk en að þarna hefðu Valsmenn tekið hárrétta ákvörðun. Benedikt tók undir það.

„Börn eiga að fá að vera börn. Grunnskólakrakkar eiga ekki að fara upp í meistaraflokk. Alveg sama hversu góðir þeir eru þá liggur ekkert á. Svo má skoða þetta á fyrsta ári í framhaldsskóla en það er bara fyrir þá sem eru alveg einstakir,“ sagði Benedikt áður en Hlynur benti á að enginn jafnaldri Atla, ári eða tveimur árum eldri, væri í neinu sérstöku hlutverki hjá liðunum í Bónus-deildinni.