Afstaða fjármálaráðherra til sölu á HS Orku mun liggja fyrir í fyrramálið

Afstaða fjármálaráðuneytisins til sölu Orkuveitunnar á hlut í HS Orku til Magma mun liggja fyrir í kvöld eða á morgun, segir Steingrímur J. Sigfússon fjármálaráðherra. Hann segir að málið hafi verið rætt við fjölmarga aðila að undanförnu, þar á meðal fulltrúa Orkuveitunnar.

Guðlaugur Sverrisson, stjórnarformaður Orkuveitu Reykjavíkur, sagði í kvöldfréttum Ríkisútvarpsins að ríkið verði að gefa svör sem allra fyrst um hvort og þá hvernig það hyggst hafa afskipti af kaupum Magma á hlut OR í HS Orku. Tilboð Magma í hlutinn renni út síðdegis á morgun og því þurfi að hafa hraðar hendur.

Steingrímur segir að stjórnvöld eigi enga beina aðkomu að málinu. Ekki standi til að ríkið eitt kaupi hlut Orkuveitunnar í HS Orku enda hafi fjármálaráðherra enga lagalega heimild til að kaupa hlutinn.