Kristján Hauks: Leiðinlegast af öllu að tapa á KR-vellinum

Kristján Hauksson, fyrirliði Fram, var vonsvikinn eftir tapið gegn KR í kvöld en reyndi þó að brosa í kampinn.

„Mér fannst við byrja seinni hálfleikinn ágætlega. Svo skorar Bjöggi og svo Rutgers en við töldum það hafa verið brot. Allt í einu lendum við 2-1 undir og þá dettum við alveg niður og getum ekki rassgat eftir það," sagði Kristján svekktur.

„Við höfum verið duglegir að koma til baka í síðustu leikjum og við höfðum trú á því allan tímann að við gætum komið til baka. Það gekk ekki. Kannski er KR of sterkt til lið til þess að við gætum komið til baka," sagði Kristján en Fram fær tækifæri til að svara í undanúrslitum bikarkeppninnar.

„Við ætlum að hefna þar. Við ætluðum samt ekkert að hita upp núna heldur taka þennan leik en það gekk ekki," sagði Kristján sem finnst hundleiðinlegt að tapa á KR-vellinum.

„Það er leiðinlegast af öllum völlum að tapa hérna."