Nýdönsk ambassadorar Háskólans á Bifröst

„Þetta er hluti af okkar nýstárlegu markaðssetningu – að tengjast tónleikum víðs vegar um landið. Erum að senda skilaboð. Að fara á böll, dansa og hlusta á músík sem er stór þáttur í félagslífi ungs fólks, ekki síst á Bifröst,“ segir Ágúst Einarsson, prófessor og rektor við Háskólann á Bifröst.

Í fundargerð skólans frá 21. apríl segir: Nýdönsk verður ambassador skólans. Má þetta heita frumlegur leikur en ekki þekkjast fordæmi þess að skóli komi að rekstri vinsællar hljómsveitar þótt fyrirbærið skólahljómsveit sé þekkt. Upplyfting er til dæmis kennd við Bifröst. Ágúst veit ekki nákvæmlega hvernig samningum við Nýdönsk er háttað og vísaði á markaðsstjóra skólans, Kristínu Ólafsdóttur, hálfsystur hljómborðsleikara Nýdanskra, Jóns Ólafssonar – en ekki náðist í hana í gær.

Ágúst segir mikið tónlistarlíf í Bifröst og þetta er liður í að styðja við það.

„Tengjum vinsæla hljómsveit skólanum, leggjum góðum málum lið og látum músíkina tala.“ Gamli Verzlóneminn Jón segir Nýdönsk fá sanngjörn vinnulaun fyrir sitt framlag. „Það vakna ýmsar hugmyndir í þessari kreppu. Það er nú ekki þannig að við séum með Bifrastarmerkið á enninu þegar við komum fram en reynum að vera þessum frábæra háskóla til sóma.“ Upplyfting mun vera að vinna að plötu og Jón telur þetta hafa hleypt skapi í það ágæta band. „Þetta hefur haft mikil áhrif á Upplyftingu og ég spyr: Munu þeir spila fyrir Verzló og MH í haust til að hefna sín? Ég hef heyrt að þeir íhugi að skila stúdentshúfum sínum og skólaskírteinum vegna málsins. Kannski við setjum „Traustur vinur“ á prógrammið til að blíðka þá.“- jbg