Missti framan af manndómnum á Landspítalanum

Tæplega fimmtugur norskur karlmaður sem er búsettur á Íslandi krefst bóta eftir að hafa misst framan af manndómi sínum vegna læknamistaka á Landspítalanum. Þetta kemur fram í vefútgáfu norska blaðsins Verdens Gang í dag.

Maðurinn sem heitir Jan Gunnar Langås kveðst hafa farið í einfalda aðgerð á Landspítalann vegna þvagfærasýkingar. Hins vegar hafi þvagleggur verið settur upp á rangan hátt með þeim afleiðingum að drep hljóp í kynfæri hans. Nú næstum tveimur árum eftir aðgerðina kveðst Jan Gunnar enn vera með miklar kvalir í manndómi sínum.

Hann segir í samtali við Verdens gang að starfslið spítalans hafi eyðilagt líf hans. Honum rísi ekki lengur hold nema með aðstoð Viagra, limur hans sé þremur sentímetrum styttri en áður og að hann þrauki ekki án sterkra verkjalyfja. Hann hefur verið óvinnufær frá því í september 2007 og verið á bæði morfíni og meþadóni til að slá á verkina.