Eðlilegt að það taki tíma að læra þingsköp

Ásta Ragnheiður Jóhannesdóttir forseti Alþingis segir eðlilegt að það taki tíma fyrir nýja þingmenn að læra þingsköp og því hafi oft tekið á við fundarstjórn á því annasama átakaþingi sem lauk í gær. Hún segir brýnt að þingmenn undirbúi sig vel fyrir erfitt þing í vetur þar sem mörg stór verkefni bíði.

Ný afstaðið sumarþing er eitt mesta átakaþing lýðveldissögunnar og þar var tekið á mörgum stórum málum. Lengst var talað um þingsályktunartillögu utanríkisráðherra um aðildarumsókn að Evrópusambandinu, eða í rúmar 48 klukkustundir, af þeim 283 klukkustundum sem fóru í almenna þingfundi á sumarþinginu. Í ofanálag eru um tveir þriðju þingheims með tveggja ára þingreynslu eða skemmri og því reyndi oft á fundarstjórn forseta, þegar nýir þingmenn voru að feta sig eftir ströngum þingsköpum Alþingis.

Samkvæmt þingsköpum hefði Alþingi átt að koma saman til haustþings næst komandi þriðjudag, en forseti þingsins ákvað í samráði við ríkisstjórn og yfirstjórn þingsins að fella niður septemberþing og fresta þingfundum til 1. október.