Eyjamenn hafa rætt við Atla - mál Gunnars Heiðars enn í frosti

Sigursveinn Þórðarson, formaður knattspyrnudeildar ÍBV, viðurkennir að félagið hafi sett sig í samband við Atla Jóhannsson en tilkynnt var formlega á heimasíðu KR í gær að leikmaðurinn myndi ekki skrifa undir nýjan samning við Vesturbæjarliðið.

„Þetta er náttúrulega bara nýskeð með Atla að hann sé hættur hjá KR. Við höfum spjallað við hann og auðvitað höfum við áhuga á honum enda er hann góður leikmaður og lék vel með ÍBV á sínum tíma. Það er ekki verra að hann sé Eyjamaður," segir Sigursveinn.

„Við ætlum að gera betur en í fyrra og til þess þurfum við að styrkja okkur. Atli Jó kemur til greina eins og aðrir góðir leikmenn og það er ekkert nauðsynlegt að menn eigi rætur að rekja til Vestmannaeyja. Það er samt bara þannig að nú virðist sem nokkrir Eyjapeyjar séu á lausu og því ekkert óeðlilegt að við skoðum þau mál," segir Sigursveinn sem segir stöðu mála hjá Gunnari Heiðari Þorvalssyni vera óbreytta en Eyjamenn fylgist grannt með gangi mála þar.

„Gunnar Heiðar er náttúrulega samningsbundinn Esbjerg og þannig er staðan núna en við fylgjumst náið með stöðu mála þar," segir Sigursveinn.