Bretar bítast um Íslandsmynd

„Þetta er alveg meiri háttar," segir leikstjórinn Jóhann Sigþórsson. Tvö bresk fyrirtæki hafa lýst yfir áhuga á að kaupa dreifingarréttinn á nýrri íslenskri heimildarmynd hans, Living on the Edge.

Myndin verður kynnt á sjónvarpssöluhátíð í Cannes á næstunni þar sem dreifingaraðilarnir munu bítast um hana. Einnig eru miklar líkur á því að sjónvarpsstöðin National Geographic kaupi hana til sýningar.

„Þetta er ágætis peningur því þetta verður selt um allt. Þetta er íslenska tilraunin til að gera eitthvað Planet Earth-efni," segir Jóhann en Profilm sér um framleiðsluna.

Ætlunin er að myndin, sem er 52 mínútna löng, sýni sálina í íslensku þjóðinni. Enginn viðtöl eru í henni heldur fjallar sögumaður um það sem fyrir augu ber. Um tónlistina sér Hilmar Örn Hilmarsson. „Við höfum kallað þetta í gríni fyrsta skrefið til endurreisnar Íslands. Þetta er mjög pósitíf mynd fyrir Ísland og það er ekki minnst á bankahrunið eða neitt í þeim dúr," segir Jóhann.

„Þarna eru náttúrulífsmyndir og heilmikið kíkt á mannlífið líka."

Jóhann segir að kreppan hafi ýtt undir gerð myndarinnar þó svo að hún hafi verið í mörg ár í undirbúningi. „Ég hef verið að safna efni í hana í fjögur ár. Þegar hrunið kom fannst mér tilvalið að kýla á þetta og ég myndaði það síðasta í febrúar."

Jóhann er margreyndur leikstjóri heimildarmynda og hefur gert myndir fyrir stöðvar á borð við Discovery, Animal Planet, TV2 og Danmarks Radio. Á meðal íslenskra heimildarmynda hans er Fæddur í paradís sem var ádeilumynd á virkjanaframkvæmdir þar sem rithöfundurinn Guðmundur Páll Ólafsson var í forgrunninum. - fb