Samkynhneigður dómari fær rauða spjaldið

Fótboltayfirvöld í Tyrklandi eru í kastljósi fjölmiðla þessa dagana eftir að þau ráku dómara sem hafði ekki gert neitt annað af sér en viðurkennt að hann væri samkynhneigður.

Dómarinn sem kom út úr skápnum heitir Halil Ibrahim Dincdag og hann ætlar ekki að láta labba yfir sig á skítugum skónum heldur hefur hann kært knattspyrnusambandið í Tyrklandi fyrir meðferðina.

„Þeir héldu að ég væri bara lítill maur sem þeir gætu stigið ofan á. Þeir héldu að ég myndi hlaupa burt og fela mig út í horni. Það kemur ekki til greina. Þeir hafa eyðilagt líf mitt og ég mun berjast við þá alla leið," sagði Dincdag ákveðinn.

Hann var ekki bara rekinn sem dómari heldur einnig sem útvarpsmaður.

Hinn 33 ára gamli Dincdag hafði dæmt knattspyrnu í Tyrklandi í 13 ár. Mikið fjölmiðlafár varð þegar upp komst um málið í maí og dómarinn neyddist til að flýja til Istanbúl svo fjölskyldan hans myndi ekki verða fyrir frekara ónæði vegna málsins.

Á endanum ákvað hann að binda enda á slúðurfréttirnar og mætti í vinsælan íþróttaþátt í sjónvarpi þar sem hann staðfesti að vera samkynhneigður.

„Daginn sem fjölmiðlar byrjuðu að skrifa um mig fór ég í dá. Daginn sem ég fór í sjónvarpið dó ég. 33 ár eru horfin úr lífi mínu og ég geri ekkert annað en að endurbyggja líf mitt," sagði Dincdag.

Það þótti ákaflega hugað af Dincdag að koma fram í sjónvarpi. Samkynhneigð er ekki ólögleg í Tyrklandi en miklir fordómar eru í garð samkynhneigðra í landinu. Þar þykir ekkert tilttökumál að kalla dómara „helvítis homma" sem dæma illa.

„Þeir öskra þetta alltaf úr stúkunni ef þeim mislíkar eitthvað. Nú, hér er ég," sagði Dincdag.

Dincdag hefur fengið mikinn stuðning í málinu víða í Tyrklandi. Gamaldags viðhorf eru þó ekki horfin líkt og hjá vinsælasta knattspyrnulýsara landsins, Erman Toroglo, sem vill ekki að Dincdag fái að dæma á nýjan leik.

„Ég held að samkynhneigðir dómarar hafi tilhneigingu til þess að gefa myndarlegum knattspyrnumönnum vítaspyrnur," sagði Toroglo en þessi ummæli fóru ekki vel í Dincdag.

„Ræðst Toroglo á allar sætar stelpur sem hann mætir út á götu?"