Handtekinn eftir tíu bankarán

Maður, sem grunaður er um að hafa rænt tíu banka í fjórum ríkjum Bandaríkjanna, var handtekinn í Missouri á laugardaginn. Fyrrverandi lögreglumaður, sem látið hefur af störfum fyrir aldurs sakir, sá ræningjann á vegahóteli í borginni Kingdom. Honum fannst grunsamlegt að maðurinn forðaðist augnsamband svo hann fletti upp á vefsíðu sjónvarpsþáttarins „America's Most Wanted". Þar sá hann lýsingu á bíl sem kom heim og saman við bílinn sem ræninginn var á. Lögreglumaðurinn hringdi því í fyrrum samstarfsmenn sína sem brugðust skjótt við og höfðu hendur í hári ræningjans.