Garðar Örn dæmir ekki meira í sumar

Garðar Örn Hinriksson mun ekki dæma meira í sumar vegna hnémeiðsla. Þetta er annað árið í röð þar sem hann missir af lokaspretti tímabilsins.

„Það er hundfúlt að standa í þessu," sagði Garðar í samtali við Vísi. „Sérstaklega vill enginn dómari missa af síðustu leikjum tímabilsins enda oft mikilvægir leikir."

Þetta hefur einnig áhrif á störf hans sem alþjóðlegur dómari en hann missti af ferð til Bosníu í fyrra. „Ég missi núna af ferð sem ég átti að fara til Hvíta-Rússlands á föstudaginn. Það er riðill í undankeppni EM sautján ára landsliða sem fer fram þar."

Hann ætlar þó að halda ótrauður áfram þrátt fyrir að hann þurfi gangast undir aðgerð vegna meiðslanna. „Ég veit að vísu ekki hvað endurhæfingin tekur langan tíma en ég held að sjálfsögðu áfram að dæma."