Leiðin á milli Reykjavíkur og Ísafjarðar styttist á morgun

Ein mesta bylting sem um getur í samgöngumálum Vestfjarða verður á morgun þegar nýja bogabrúin yfir Mjóafjörð í Ísafjarðardjúpi verður vígð. Samgönguráðherra klippir á borðann klukkan tvö og eftir það verður brúin opnuð umferð.

Með henni styttist vetrarleiðin milli Reykjavíkur og Ísafjarðar um 32 kílómetra og síðustu malarkaflarnir á Djúpvegi heyra sögunni til.

Fyrir lok þessa mánaðar verða svo önnur tímamót í samgöngusögunni þegar nýi vegurinn yfir Arnkötludal klárast en með honum tengjast stærstu byggðir Vestfjarða í fyrsta sinn öðrum landshlutum með malbikuðum vegi alla leið.