Óli Kristjáns: Spiluðum vel í 90 mínútur

Ólafur Kristjánsson þjálfari Breiðabliks var ánægður með allar 90 mínúturnar hjá sínu liði í dag. Hann sagði liðið hafa mætt af miklum krafti í leikinn og haldið það út. Hann gefur lítið fyrir þær raddir sem heyrst hafa að undanförnu að liðið missi niður unna leiki.

"Menn hafa mikið verið að tala um hitt og þetta. Við höfum hinsvegar bara haldið áfram að vinna í okkar hlutum og leyft mönnum að tala um það sem þeir vilja. Við höfum hinsvegar lært af okkar leikjum,"

Hann segir Valsliðið hafa komið sér lítið á óvart í dag. "Eins og Atli hefur bent á þá eru þeir að vinna í liðinu hjá sér og það tekur bara tíma."

Aðspurður hvort hann telji Valsmenn eiga eftir að klára mótið með stæl segir Ólafur:

"Ég veit það ekki, ég var rosalega fókuseraður á mitt líð í dag. Valur er hinsvegar félag með mikla sögu og hefð. Við erum hinsvegar að byggja upp og ég er ráðinn til þess að gera það."

Breiðablik hefur verið að skora mikið af mörkum í sumar og Guðmundur Pétursson hefur verið þeim mikill styrkur eftir að hann kom frá KR sem lánsmaður.

“Hann gefur okkur mikla vídd í sóknarleikinn og það sem er líka að gerast er að það eru margir að skora. Alfreð og Kristinn eru báðir senterar en ekki kanntarar og við reynum að útfæra 4-2-3 með það í huga.”