Starfsfólkið er orðið úrvinda

„Starfsfólkið er orðið úrvinda," segir Páll E. Winkel, forstjóri Fangelsismálastofnunar ríkisins, spurður um stöðuna í fangelsismálum nú. Þessa dagana bætast sífellt fleiri í hóp gæsluvarðhaldsfanga. Vegna rannsóknar lögreglu á einu máli sitja í gæsluvarðhaldi níu manns eftir úrskurð Héraðsdóms Reykjaness. Þrír þeirra bættust við í gær.

„Þetta er hrikalegt ástand," segir Páll. „Nú er ekki annað í boði en að ganga eftir úrræðum í þeim vanda sem við höfum þegar gert ráðamönnum grein fyrir. Þessi þróun er hröð og ófyrirsjáan­leg, en það má allt eins búast við því að ástandið eigi enn eftir að versna."

Páll segir ljóst að grípa þurfi í auknum mæli til þess að vista gæsluvarðhaldsfanga á lögreglustöðvum, ef önnur úrræði fáist ekki. Starfsfólk Fangelsismálastofnunar standi frammi fyrir miklum vanda á degi hverjum.

„Ef ekkert verður að gert í gæsluvarðhalds- og einangrunar­málum er fullkomlega ljóst að ástandið verður illviðráðanlegt. Það er hvorki starfsfólki né föngum bjóðandi."