Facebook sparaði frambjóðendum auglýsingakostnað

Það voru ekki allir sem eyddu fúlgum fjár í þá miklu prófkjörsbaráttu sem lauk um helgina. Þannig greindi Rósa Guðbjartsdóttir, sem er nýliði í hópi efstu manna á lista Sjálfstæðisflokksins í Suðvesturkjördæmi, frá því á facebook í gær að hún hefði varið tæpum 150 þúsund krónum í sína prófkjörsbaráttu.

Rósa segir að hún hafi tekið þá ákvörðun í upphafi að verja ekki hárri fjárhæð í prófkjörsbaráttuna, sér í lagi vegna þess hvernig efnahagsástandið væri. „Mér fannst líka gott að þurfa ekki að leita til fyrirtækja um styrk. Mér finnst í því felast töluvert frelsi," segir Rósa. Hún segist hafa nýtt sér tengslanetið á facebook mjög mikið. Þá hafi hún jafnframt viljað láta reyna á það hvort sjálfstæðismenn væru ánægðir með sín störf hingað til. En Rósa er bæjarfulltrúi og varaþingmaður. Rósa segir að hún hafi eytt um 145 þúsund krónum í prentun á auglýsingaspjöldum og í að halda opinni kosningamiðstöð síðustu dagana fyrir prófkjörið. Rósa segir að þessi aðferð hennar við prófkjörsbaráttuna hafi skilað henni árangri því að hún hafi náð sæti sem sé þingsæti í dag, en Rósa náði 6. sæti á lista.

Katrín Júlíusdóttir sem hlaut annað sætið í prófkjöri Samfylkingarinnar í Suðvesturkjördæmi segist hafa varið um 250 þúsund krónum í prófkjörið sem hafi aðallega farið í prentun á bæklingum og dreifingu. „Þetta kallast held ég að sleppa býsna vel," segir Katrín og bendir á að hún hafi verið svo heppin að fjölskylda hennar og vinir hafi hjálpað henni að bera út bæklingana í Kópavogi, sem er heimabær Katrínar.

Katrín segist jafnframt hafa nýtt sér facebook í prófkjörinu og ræktað tengsl sín við stuðningsmenn þar. „Ég kalla þetta facebook prórkjörsbaráttuna miklu," segir Katrín. Katrín segir að hún muni birta uppgjör eftir nokkra daga, en samfylkingarmenn þurfi að skila skýrslu um kostnað við prófkjör til kjördæmaráðs.

Þá segir Björgvin Valur Gíslason, sem tók þátt í prófkjöri Samfylkingarinnar í Reykjavík, á bloggi sínu að hann hafi varið um 100 þúsund krónum í prófkjörsbaráttu sína. Björgvin er býsna ánægður með árangur sinn þrátt fyrir að hafa ekki orðið á meðal átta efstu. „Það eina sem ég er ósáttur við er að Sirrý skuli hafa náð betri árangri en ég," segir Björgvin á blogginu sínu.