Færri í fitusog og dýrari brjóstastækkanir

„Við vitum að það er aðallega yngra fólkið sem fer í silíkonaðgerðir og fitusog. Þetta eru tvær algengustu fegrunaraðgerðirnar sem framkvæmdar eru og það hefur dregið úr báðumm. Það er tölvuvert minni eftirspurn en hefur verið," segir Guðmundur M.Stefánsson lýtalæknir hjá Domus Medica. Fréttablaðið hringdi í nokkra lýtalækna hér í bæ og samkvæmt lauslegri könnun blaðsins virðist sem yngra fólk haldi að sér höndum og minni eftirspurn sé eftir fitusogsaðgerðum hjá hópnum undir fertugu.

Ólafur Einarsson segir það vera sína tilfinningu að það sé yngra fólkið sem haldi að sér höndum. „Ég er búinn að vera mjög lengi í þessu og í kringum 1991 var dálítil lægð í efnahagslífinu og þá fannst mér þetta lýsa sér svipað - að yngra fólk kom minna. En lífið heldur áfram og við lýtalæknar reynum að koma til móts við fólk í kreppunni. Þannig hafa öll aðföng hækkað mikið og brjóstastækkunarpúðarnir tvöfaldast í innkaupsverði. Brjóstaaðgerðirnar hafa þó ekki hækkað nema kannski um 20-30 prósent þannig að við lýtalæknar erum að taka á okkur stóran hluta þessara hækkana sjálfir."

Þórdís Kjartansdóttir lýtalæknir hjá Læknastððinni tekur í sama streng. „Í fyrsta skipti er ég með mismunandi verð á brjóstastækkunum eftir því hvaða púða ég er að nota. Dropalagapúðarnir eru þar dýrari á móti þeim hringlaga.

Margir púðarnir hafa tvöfaldast í verði og þetta er auðvitað dýrari hlutinn af aðgerðinni þannig að ég hef tekið á mig að hluta til kostnaðinn", segir Þórdís og bætir við að breytingin sem hún sjái sé helst í fækkun í fitusogsaðgerðum. Guðmundur segist ekki viss hvort lýtalæknar hafi samt fundið fyrir botninum ennþá. „Maður verður að taka þennan skell á sig í þeirri von að gengið leiðrétti sig eitthvað. Það er ekki hægt að hleypa öllum kostnaði út í verðlagið eins og sum fyrirtæki virðast nú gera." - jma