Áminna ekki vegna úrvinda flugmanna

Engin áminning var veitt vegna brota flugfélagsins Jet-X á reglum um hvíldartíma flugmanna þegar þota félagsins endaði utan brautar á Keflavíkurflugvelli haustið 2007. Þetta kemur fram í svörum Flugmálastjórnar til Fréttablaðsins.

Alls voru 188 farþegar og átta manna áhöfn um borð í þotu Jet-X þegar hún rann út af braut í lendingu í Keflavík aðfaranótt 28. október 2007. Vélin var að koma úr leiguflugi til Tyrklands. Vakt flugmannanna var orðin lengri en reglur leyfðu, meðal annars vegna tafa við brottför og vegna millilendingar til eldsneytistöku í Skotlandi. Ísing var á brautinni.

Eins og komið hefur fram í Fréttablaðinu telur rannsóknarnefnd flugslysa að þreyta hafi þjakað flugmennina enda hafi þeir sjálfir kvartað undan mikilli þreytu 40 mínútum fyrir lendingu í Keflavík. Vaktin hjá þeim varð á endanum 17 klukkustundir og 20 mínútur.

„Ekki var talin ástæða til þess að gefa út formlega áminningu til Jet-X vegna þessa atviks, en félagið ákvað að nýta ekki áfram ákvæði um lengda flugvakt með aukinni áhöfn í kjölfar málsins,“ upplýsir Flugmálastjórn sem kveðst hafa farið ítarlega yfir málið með forsvarsmönnum Jet-X og skoðað framkvæmd þessara mála hjá fyrirtækinu. „Í kjölfar þessa atviks gaf Flugmálastjórn út skýringarefni til íslenskra flugrekenda í flutningaflugi um með hvaða hætti flugrekendur skuli uppfylla ákvæði reglugerðar um flug- og vinnutímamörk og hvíldartíma flugáhafna sem var í gildi á þeim tíma sem óhappið átti sér stað.“

Rannsóknarnefnd flugslysa gerði einnig athugasemdir við viðbúnað á jörðu niðri, meðal annars vegna hreinsunar flugbrauta og viðnámsmælinga. Aðspurð segist Flugmálastjórn ekki hafa gert athugasemdir við vinnulag og búnað á Keflavíkurflugvelli í kjölfar atviksins með Jet-X þotuna. Vetrarhreinsun og viðnámsmælingar á flugvöllum séu teknar út reglulega og búast megi við að nýjar rannsóknir á viðnámsmælingum leiði til þess að nýjar kröfur og leiðbeiningar komi fljótlega fram.

Spurð um hversu algengt það sé að hvíldartími flugmanna sé ekki virtur svarar Flugmálastjórn að það heyri til undantekninga. Í reglugerð sem gilt hafi þegar Jet-X þotunni hlekktist á komi fram að hægt sé að lengja flugvakt upp að ákveðnum mörkum eigi sér stað ófyrirséðar aðstæður í flugstarfi. Reglulegar úttektir séu á rekstri íslenskra flugfélaga, meðal annars á flug- og vinnutímamörkum og hvíldartíma flugáhafna.

gar@frettabladid.is