Vímuakstur í borginni

Tveir voru teknir fyrir ölvunarakstur á höfuðborgarsvæðinu í gær að sögn lögreglu. Um miðjan dag var tvítugur piltur stöðvaður fyrir þessar sakir á Sæbraut og í gærkvöld var tæplega þrítugur karl tekinn í Hafnarfirði af sömu ástæðu.

„Þá voru tveir piltar, 19 og 17 ára, handteknir fyrir að aka undir áhrifum fíkniefna," segir ennfremur í tilkynningu frá lögreglu en sá eldri var stöðvaður í miðborginni og sá yngri á Miklubraut. „Með honum í bílnum voru þrír jafnaldrar hans. Einn þeirra reyndist vera með fíkniefni í fórum sínum og var hann líka handtekinn og færður á lögreglustöð," segir að lokum.