Sveitarfélögin kvíða nýju fasteignamati

Ljóst þykir að fasteignamat mun lækka umtalsvert um mánaðamótin, þegar Fasteignaskrá Íslands gefur út nýtt mat. Lækkunin þýðir verulegt tekjutap fyrir sveitarfélögin í landinu á næsta ári, ef álagningarhlutfall einstakra sveitarfélaga verður ekki hækkað. Áhyggjur sveitarstjórnarfólks komu greinilega í ljós á nýlegum samráðsfundi Sambands íslenskra sveitarfélaga (SÍS).

Fast tekjustreymi sveitarfélaga byggir á útsvari, fasteignasköttum og framlögum úr Jöfnunarsjóði sveitarfélaga. Tekjur þeirra af fasteignasköttum, sérstaklega á vaxtarsvæðum, hafa hækkað jafnt og þétt á síðustu árum vegna uppgangs á fasteignamarkaði. Nú er sá markaður hruninn og er búist við að lækkun fasteignaverðs muni nema tugum prósenta áður en um hægist.

Fasteignaskattar skiluðu sveitarfélögunum í landinu ríflega 22 milljörðum króna í tekjur á síðasta ári og hvert prósent til lækkunar nemur því um 220 milljónum króna lægri tekjum.

Halldór Halldórsson, formaður SÍS, segir ljóst að allar tekjur sveitarfélaganna séu að lækka. „Tilhneigingin hlýtur að verða sú að menn reyna að halda þessum tekjum óbreyttum enda eini tekjustofninn sem þau geta haft áhrif á.“

Álagningarhlutfall hefur verið lækkað mikið þar sem fasteignaverð hefur hækkað hvað mest í þenslu síðustu ára. Noti sveitarfélögin það svigrúm sem þau hafa til hækkunar telur Halldór að mörg sveitarfélög geti haldið óbreyttum tekjum, þótt til mikillar lækkunar fasteignamats komi. Þetta eigi þó ekki við um öll sveitarfélög.

Ef Reykjavík er tekin sem dæmi þá eru tekjur af fasteignaskatti í ár áætlaðar 2,6 milljarðar af íbúðarhúsnæði, tveir milljarðar af opinberu húsnæði og 7,7 milljarðar af atvinnuhúsnæði.

Ef horft er til fasteignaskatta og fasteignagjalda íbúðarhúsnæðis þá eru tekjur borgarinnar í ár áætlaðar tæpir fjórir milljarðar miðað við núverandi skattaprósentu. Væri hún fullnýtt væru tekjur borgarinnar tæpir 7,5 milljarðar króna. Svigrúm borgarinnar til að halda sömu tekjum er því mikið.

svavar@frettabladid.is