„Öll svona mál eru gríðarlega viðkvæm“

Eineltismál eru í ólestri í Hamraskóla þar sem sex ára drengur var nýlega stunginn og barinn. Þetta segir móðir drengs sem beittur var einelti í skólanum í mörg ár. Meðal annars af starfsmanni skólans sem áminntur var fyrir að beita son hennar ofbeldi.

Í fréttum okkar í gær sögðum við frá máli sex ára drengs sem beittur var alvarlegu ofbeldi í Hamraskóla í Grafarvogi en hann var meðal annars stunginn til blóðs með blýanti, barinn og klóraður. Drengurinn hefur undanfarna mánuði orðið fyrir miklu einelti en faðir hans segir að stjórnendur Hamraskóla hafi algjörlega brugðist í málinu.

„Við getum alveg eins skilið barnið okkar eftir á umferðareyju yfir daginn," sagði faðir drengs sem var stunginn og barinn í Hamraskóla í fréttum Stöðvar 2 í gærkvöldi.

Í kjölfar fréttarinnar höfðu nokkrir foreldrar úr Hamraskóla samband og höfðu sömu sögu að segja. Ein móðirin á dreng sem lagður var í einelti í fjögur ár. Sonur endaði inn á barna og unglingageðdeild en móðirin segir það bein afleiðing eineltisins sem sonur hennar varð fyrir. Hún segir eineltismál í ólestri í Hamrasklóla.

„Eg held að það vanti að byggja upp ákveðnar vinnureglar þegar mál eins og þessi koma upp. Þarna var það ekki fyrir hendi. Það sem fyllti mælinn var að starfsmaður sem hafði lagt hann í einelti mjög lengi að hann réðist af honum og veitti honum áverka," sagði móðir drengs sem lagður var í einelti í Hamraskóla í mörg ár.

Starfsmaðurinn sem móðirin vísar til er skólaliði í Hamraskóla. Skólastjórinn þar staðfestir að umrætt atvik hafi átt sér stað.

„Það var talað viðkomandi starfsmann og hann fékk áminningu fyrir," sagði Yngvi Hagalínsson, skólastjóri í Hamraskóla.

Skólastjórinn segir að unnið sé eftir eineltisáætlun í skólanum en harmar að foreldrum finnist skólinn hafa brugðist börnum sínum

„Öll svona mál eru gríðarlega viðkvæm," sagði Yngvi.