Innlent

Læknarnir komast ekki af vaktinni í vetur

Vegarklúðrið á Melrakkasléttu veldur því að heilsugæslulæknarnir á Kópaskeri og Þórshöfn sjá ekki fram á að komast neitt frá vinnu í vetur. Læknirinn á Þórshöfn vill að menn taki slaginn og fari með ýturnar á síðasta spottann sem á vantar.

Horfur eru á að ekki takist í haust að opna nýjan veg yfir Melrakkasléttu þar sem Vegagerðin tryggði sér ekki leyfi landeiganda til að leggja tveggja kílómetra kafla við Kópasker. Tveir læknar sinna þessu víðfeðma svæði, annar staðsettur á Kópaskeri en hinn á Þórshöfn.

Haraldur Tómasson, sem er nýbúinn að ráða sig til Þórshafnar, segir að áformað hafi verið að þeir tveir leystu hvorn annan af en nýi vegurinn hafi verið forsenda þess fyrirkomulags. Nú sér hann ekki fram á annað en að þurfa að standa vaktina þar til snjóa leysir í vor.

Haraldur segir afar brýnt, ekki bara fyrir læknana, heldur alla íbúa svæðisins, að fá veginn í gagnið. Hann segist annars vera við öllu búinn og hafi tekið skíðin með sér, hann geti þá gengið yfir heiðina.






Tengdar fréttir

Fullbyggður vegur ónothæfur sökum klúðurs

Samgönguyfirvöld standa nú frammi fyrir einhverju mesta klúðri í sögu íslenskra vegamála. Ekki er hægt að opna nær fullbyggðan veg í stað Öxarfjarðarheiðar þar sem Vegagerðin hafði ekki tryggt sér leyfi til að leggja síðustu tvo kílómetrana. Sveitarstjórnir á Norðausturlandi er ævareiðar.

Vilja vegarspotta strax vegna klúðurs

Vegagerðin og sveitarfélög á Norðausturlandi þrýsta nú á að stuttur vegarspotti við Kópasker sleppi við umhverfismat svo ekki tefjist um meira en ár að opna nær tilbúinn þrjátíu kílómetra veg yfir Melrakkasléttu til Þórshafnar og Raufarhafnar.

Mest lesið


Fleiri fréttir

Sjá meira


×

Mest lesið