Þiggja á annað hundrað milljóna króna frá OR

Ráðgjafarfyrirtækið Arctica Finance, sem er í eigu fyrrverandi starfsmanna Landsbankans, þiggur á annað hundrað milljóna króna, fyrir ráðgjöf til Orkuveitu Reykjavíkur. Fyrirtækið fær peningana fyrir að finna kaupanda að hlut Orkuveitunnar í HS orku.

Orkuveita Reykjavíkur fékk ráðgjafarfyrirtækið Arctica Finance, í lok janúar, til að finna fyrir sig kaupanda að þriðjungshlut sínum í HS orku. Þrjú fyrirtæki bitust um að fá að finna kaupandann og þótti tilboð Arctica best. Arctica finance er sjö manna fyrirtæki, fyrrverandi starfsmanna Landsbankans.

Svo fór að kaupandi fannst, kanadíska félagið Magma Energy. Hluturinn fer á tólf milljarða króna. En fyrir þetta fær Arctica þóknum. Hún nemur núll komma áttatíu og fimm prósentum af verðmæti samningsins. Það gerir, samkvæmt útreikningum fjármálastjóra Orkuveitunnar, um eitthundrað og tvær milljónir króna.

Þetta gerir um fjórtán og hálfa milljón króna á mann, hjá Arctica. Fréttastofu er bent á að þetta hafi verið árangurstengt; svo Arctica hefði getað fengið lítið fyrir útlagðan kostnað, hefði kaupandi ekki fundist. En sumum finnst þetta líklega ágætis kaup, fyrir níu mánaða vinnu.