Segir lögfræðinga Seðlabankans blekkja

Árni Þór Sigurðsson, formaður utanríkismálanefndar, segir lögfræðinga Seðlabankans hafa blekkt utanríkismálanefnd. Minnisblað sem Sigríður Logadóttir aðallögfræðingur og Sigurður Thoroddsen, lögfræðingur á Alþjóða- og markaðssviði bankans, lögðu fyrir utanríkismálanefnd Alþingis, var ekki umsögn Seðlabankans. Þetta áréttaði Sigríður í tölvubréfi á þriðjudagskvöld. Nefndarmenn stóðu í þeirri meiningu að um formlegt álit bankans væri að ræða.

Álitið er neikvætt í garð samninganna og hafði vakið nokkur viðbrögð. Í bréfinu segir Sigríður: „Við lögfræðingar SÍ viljum undirstrika að minnisblaðið til utanríkismálanefndar er samantekt á því sem kom fram á fundinum þar sem lögfræðingar mættu sem gestir og ber ekki að líta á sem umsögn Seðlabankans sem slíka.“

Árni Þór Sigurðsson, formaður nefndarinnar, segir að alltaf hafi legið ljóst fyrir að verið væri að leita eftir umsögn bankans, ekki tveggja lögfræðinga. Aðrir nefndarmenn sem Fréttablaðið talaði við tóku undir það.

Ekki náðist í Sigríði í gær, en í svari frá Seðlabankanum segir að minnisblaðið sé hluti af gögnum sem notuð eru við gerð álits fyrir fjárlaganefnd, en fulltrúar bankans munu kynna það fyrir nefndinni í dag. Minnisblaðið sé því vinnugagn sem verði notað við lokaútgáfu álitsins. Minnisblaðið er ritað á bréfsefni Seðlabankans.

Árni Þór var harðorður í garð Sigríðar og í viðtali við Ríkis-útvarpið talaði hann um „einkaflipp“ starfsmanna bankans. „Fyrir mér virðist sem viðkomandi starfsmaður sé enn að vinna fyrir Davíð Oddsson.“

Þessi ummæli vöktu hörð viðbrögð á Alþingi og Ólöf Nordal og Ragnheiður Elín Árnadóttir, þingmenn Sjálfstæðisflokksins, kröfðust þess að Árni bæði starfsmennina afsökunar.

Svavar Gestsson, formaður samninganefndarinnar um Ice-save, segist vona að nefndin skoði álit lögfræðinganna eins og önnur álit. Það hafi þó allt aðra stöðu nú þegar búið sé að upplýsa að það er ekki álit Seðlabankans. Það breyti því þó ekki að það verði að skoða samviskusamlega, líkt og ótal önnur álit og greinargerðir sem hjálpi mönnum að komast að skynsamlegri niðurstöðu.

kolbeinn@frettabladid.is