Magnús Ingi: Þurftum þrjú stig

Von Fjölnis að halda sæti sínu í Pepsi-deildinni er orðin ansi veik en liðið gerði 3-3 jafntefli á heimavelli við Keflavík í dag. Fyrirliði Fjölnis, Magnús Ingi Einarsson, segir þó að Grafarvogspiltar haldi í vonina meðan tölfræðilegur möguleiki sé til staðar.

„Þetta var hörkuleikur og sóknir á báða bóga. Við fengum tækifæri til að klára þetta og vorum náttúrulega komnir í stöðuna 3-2. Það er mjög svekkjandi að hafa ekki náð að halda þessu," sagði Magnús.

„Við þurftum á þremur stigum að halda í dag og vonbrigði að ná þeim ekki. En ég held að við eigum enn möguleika þó þeir séu ekki mikilir. Meðan staðan er þannig þá höldum við áfram."

Magnús var annars sáttur við spilamennsku síns liðs í dag. „Leikurinn var að mörgu leyti ágætur. Við fáum samt á okkur þrjú mörk sem er ekki gott. Fram á við lékum við samt betur en oft áður," sagði Magnús.