Tvísýnt um ESB atkvæðagreiðsluna

Atkvæðagreiðslan um tillögu ríkisstjórnarinnar um aðild að ESB verður tvísýn, að mati Skúla Helgasonar, þingmanns Samfylkingarinnar. Skúli vonast til að málinu ljúki í þinginu í dag.

„Þetta er eitthvað það besta sem við getum gert til að gefa þjóðinni einhverja framtíðarsýn. Ég hef ennþá það mikla trú á kollegum mínum hér í þinginu að ég vona að menn hafi hagsmuni heildarinnar í huga þegar þeir greiða atkvæði," segir Skúli sem býst við viðburðarríkum degi í þinginu.

Skúli telur þó fullsnemmt að hefja undirbúning að veisluhöldum í kvöld, en heyrst hefur að ESB sinnar stefni að gleðskap á Ölstofunni á Vegamótastíg.