Landeyjahöfn nálgast Vestmannaeyjar hratt

Frá Heimaey til fastalandsins eru tíu kílómetrar en sú leið hefur verið að styttast hratt síðustu tvær vikur frá því trukkar Suðurverks byrjuðu að sturta grjótinu í tvo varnargarða sem eiga að skýla væntanlegri ferjuhöfn. Fimmtán svona risatæki eru í stöðugum akstri og nærri níutíu starfsmenn á þrískiptum vöktum sjá til þess að rífandi gangur er í verkinu.

Dofri Eysteinsson, eigandi Suðurverks, segist vel tækjum búinn og hafa góðan mannskap. Unnið sé allan sólarhringinn og alla daga.

Þótt þrjúhundruð metrar séu búnir er ljóst að þeir fjögurhundruð sem eftir eru verða ekki jafn fljótgerðir því dýpið verður stöðugt meira eftir því sem verkinu miðar áfram út í Atlantshafið. Garðarnir eiga að verða komnar í endanlega lengd í haust og þá fer vinna á fullt við gerð sjálfrar ferjubryggjunnar.

Það verður svo næsta sumar, eftir rúmt ár, sem höfnin verður tekin í notkun, höfn sem valda mun þáttaskilum í samskiptum Eyjamanna, ekki síst við Rangæinga. Dofri segir þetta mikla samgöngubót fyrir byggðirnar og það réttmæta.

Suðurverksmenn hófust handa síðasta sumar við að sækja grjót upp í Seljalandsheiði og safna því í haug við Markarfljót en í staðinn fyrir að flytja grjótið yfir fljótið færðu þeir einfaldlega fljótið. Þeir gerðu svo göng undir Suðurlandsveg svo trukkarnir þyrftu ekki að stoppa og þvera hringveginn en Dofri vill að þau verði áfram sem mislæg gatnamót hins nýja Vestmannaeyjavegar. Hann hvetur til þess að sá möguleiki verði skoðaður áður en rörið verður fjarlægt.