Ómaklegt að gera Ögmund að blóraböggli

Björn Bjarnason, fyrrverandi ráðherra, tekur upp hanskann fyrir Ögmund Jónasson, þingmann VG, í pistli á heimasíðu sinni og gerir athugasemdir við fréttaflutning Kastljóss.

„Uppákoman í Kastljósi sjónvarpsins í gærkvöldi var furðuleg, þegar Sigmar Guðmundsson flutti ávarp um, að Ögmundur Jónasson, alþingismaður, hefði verið undir áhrifum áfengis við atkvæðagreiðslu á Alþingi, enda hefði hann neitað viðtali við sjónvarpið með vísan til þess, að hann hefði fyrr um daginn fengið sér vínglas. Erfitt er að átta sig á því, hvað vakir fyrir Kastljósi með slíkri fréttamennsku," segir Björn.

Sjálfur segist Ögmundur hafa fundið til áhrifa og ákveðið að fara ekki í umrætt viðtal af prinsipp ástæðum.

„Hitt er jafnframt staðreynd, að áfengisneysla hefur tekið á sig þá mynd, að skálað er í vín- eða bjórglasi með mat í hádegi, ef svo ber undir, og einnig má sjá hér eins og víða um lönd, að vinnufélagar fái sér bjórglas á kaffihúsi að vinnu lokinni," segir Björn.

Sé Kastljós að segja hófdrykkju stríð á hendur er það virðingarvert, að mati Björns. „Hins vegar er ómaklegt, að Ögmundur Jónasson sé gerður að blóraböggli í því stríði."