Eldflaugarskot á Reykjanesskaga í dag

Öflugustu eldflaug, sem Íslendingar hafa smíðað til þessa, verður skotið á loft á Reykjanesskaga eftir hádegi í dag. Eldflaugafélagið Amateur Icelandic Rocketry stendur fyrir eldflaugarskotinu, sem verður klukkan hálf tvö á Höskuldarvöllum nálægt fjallinu Keili.

Flaugin er átta kíló að þyngd og reiknað er með að hún nái 1.000 kílómetra hraða á klukkustund og þriggja kílómetra hæð, en svo hátt hafa íslenskar eldflaugar ekki áður komist. Tveggja kílóa þung eldsneytisblanda, gerð úr saltpétri og sykri, knýr flaugina í 25 sekúndur en eftir það á hún að svífa til jarðar í fallhlíf.

Magnús Már Guðnason, formaður eldflaugafélagsins, segir að vindhraði hafi verið í mesta lagi í morgun en spáð væri að hann myndi lægja og taldi að vindurinn myndi ekki koma í veg fyrir skotið. Fyrir þá sem vilja fylgjast með má geta þess að leiðin að Höskuldarvöllum er greiðfær en þangað er hátt í klukkustundarakstur úr Reykjavík. Farið er af Reykjanesbraut á mislægum gatnamótum á móts við Kúagerði inn á malarveg.

Skotsvæðið verður girt af og er áhorfendum bent á að passa að börn leiki ekki lausum hala þar nærri. Þótt þetta verði stærsta eldflaugaskot af hálfu Íslendinga hefur mun stærri flaugum verið skotið áður á loft hérlendis. Það gerðu franskir vísindamenn á Mýrdalssandi á árunum 1964 og 1965 þegar þeir skutu Dragon-flaugum út í geim til að rannsaka Norðurljósin.