Hefði talið réttast að allir yfirgæfu þingsalinn

„Ég hefði nú bara talið réttast ef allir hefðu gengið út," segir Ásbjörn Óttarsson, þingmaður Sjálfstæðisflokksins, sem yfirgaf þingsal í stuðningsskyni við Ásmund Einar Daðason, þingmann Vinstri grænna. Ásmundur hafði áður yfirgefið salinn eftir að hafa sagst verið beittur þrýstingi í Evrópusambandsmálinu.

Ásbjörn segist í samtali við fréttastofu ekki vilja skrifa upp á það að þingmenn séu kúgaðir með því að taka þátt í umræðunum og þykir með ólíkindum að slíku sé ljóstrað upp þegar umræður um risavaxið mál séu að hefjast.

„Ég fór ekki inn á alþingi til að láta kúga mig, og hefði gert það nákvæmlega sama og Ásmundur í þessari stöðu," segir Ásbjörn.

Hann segist ekki hafa rætt þá ákvörðun sína að sniðganga umræðurnar við neinn fyrirfram.

„Ég spurði engan um leyfi. Þetta er bara mín sannfæring."

Hann segir aðspurður að hvert og eitt flokkssystkina hans verði að gera upp við sig hvort þau fylgi hans fordæmi.