Tugmilljónatjón vegna elds á Grundarfirði

Tugmilljónatjón varð þegar eldur kviknaði í gamla fiskmarkaðnum við Sólvelli í Grundarfirði á tólfta tímanum í gærkvöld.

Að sögn Garðars Svanssonar, varaslökkviliðsstjóra á staðnum, var vindur töluverður og erfitt að eiga við eldinn. Slökkviliðsmenn á Grundarfirði kölluðu eftir aðstoð frá nágrannasveitarfélögunum og þegar mest var voru um 30 slökkviliðsmenn á fimm bílum að berjast við eldinn. Mikinn reyk lagði frá húsunum sem brann og voru íbúar í nærliggjandi húsum beðnir um að yfirgefa hús í nágrenninu. Naut fólkið aðstoðar björgunarsveita á staðnum.

Stærsta byggingin er óskemmd en tvær aðrar minni byggingar eru brunnar ásamt netum og öðrum veiðafærum sem inni í þeim voru.