Lögreglan á Blönduósi stöðvar umfangsmikla kannabisræktun

Í þó nokkurn tíma hefur lögreglan á Blönduósi haft til rannsóknar ætlaða kannabisræktun á sveitabæ í nágrenni Blönduóss.

Það var svo í gærkvöldi sem lögreglan lét til skarar skríða og húsleit var framkvæmd.

Á vettvangi var einn maður handtekinn en hann var gripinn við það að vökva plönturnar.

Kannabisræktunin var mjög fullkomin og þannig hönnuð að ekki þurfti að koma á sveitabæinn nema á einhverra daga fresti og kanna með ástand ræktunarinnar samkvæmt lögreglunni á Blönduósi.

Að öðru leyti var hún alveg sjálfvirk.

Við leit í húsinu kom í ljós að á þriðja hundrað kannabisplantna voru þar á ýmsum stigum vaxtar en ríflega helmingur var kominn að uppskeru.

Við rannsókn málsins hefur komið í ljós að ekki var búið að uppskera, og er lögreglan á Blönduósi afar stolt yfir því að hafa komið í veg fyrir að efnin færu í sölu.

Maðurinn sem var handtekinn hefur viðurkennt aðild sína að málinu. Hann var einn að verki.

Maðurinn var látinn laus nú undir kvöld. Um aðkomumann á þrítugsaldri var að ræða.

Við rannsóknina naut lögreglan á Blönduósi aðstoðar starfsmanna fíkniefnadeildar lögreglustjórans á Höfuðborgarsvæðinu sem og rannsóknarlögreglumanna frá lögreglunni á Akureyri.