Verklok á Hólmahálsi nálgast

Lokasprettur við nýjan kafla á Norðfjarðarvegi um Hólmaháls á milli Eskifjarðar og Reyðarfjarðar stendur nú yfir en verklok eru samkvæmt áætlun í byrjun október. Nýi vegurinn verður 5,1 kílómetrar að lengd og liggur talsvert lægra í hálsinum en núverandi vegur, að fram kemur í frétt á vef samgönguráðuneytisins.

Þar segir að Kristján Möller, samgönguráðherra, hafi verið á ferð um framkvæmdasvæðið í gær og ræddi við starfsmenn kynntu honum stöðuna í verkinu. Verktakafyrirtækið Suðurverk sér um framkvæmdirnar.

„Verið er að ljúka skeringum og efnisvinnslu á ysta hluta vegarins og er langt komið að aka neðra burðarlagi í veginn. Efnið úr skeringum er að mestu notað í burðarlög vegarins. Gert er ráð fyrir að efri burðarlög verði lögð í næsta mánuði og að verkið verði langt komið í október en verklok áttu samkvæmt áætlun að vera í byrjun október. Suðurverk hefur bætt við starfsmönnum í verkið síðustu daga," segir á vef ráðuneytisins.