Þúsundir hvetja forsetann til að beita málskotsréttinum

Um sex þúsund manns hafa skráð nafn sitt á vefsíðuna kjosa.is og um 16 þúsund manns hafa skráð sig á facebook síðu í því skyni að hvetja Ólaf Ragnar Grímsson forseta Íslands til þess að staðfesta ekki lög um ríkisábyrgð vegna Icesave. Lögin voru samþykkt á Alþingi í gær með 34 atkvæðum þingmanna stjórnarmeirihlutans.

Forsetinn mun taka við áskoruninni frá kjosa.is á mánudaginn en gert er ráð fyrir að þann sama dag muni fjármálaráðherra senda forsetanum lögin til staðfestingar. Eftir það hefur hann tvær vikur til þess að staðfesta þau.

Eitt fordæmi er fyrir því í 65 ára sögu lýðveldisins að forseti neiti að staðfesta lög Alþingis. Það var árið 2004 þegar Ólafur Ragnar Grímsson neitaði að staðfesta lög um fjölmiðla. Í því tilfelli var málinu ekki skotið til þjóðarinnar eins og stjórnarskráin gerir ráð fyrir heldur dró ríkisstjórnin málið til baka.