Annað efnahagshrun blasir við

Annað efnahagshrun gæti blasað við náist ekki að tryggja sátt á milli ríkisstjórnar og atvinnurekenda segir framkvæmdastjóri Samtaka atvinnulífsins. Framtíð kjarasamninga á almennum vinnumarkaði ræðst á næstu klukkustundum.

Lítið hefur þokast í viðræðum stjórnvalda, atvinnurekenda og Alþýðusambandsins í dag. Samskiptin hafa reyndar farið fram að mestu á Netinu þar sem helstu ráðamenn landsins sitja nú þing Norðurlandaráðs í Stokkhólmi í Svíþjóð.

Á miðnætti rennur út frestur atvinnurekenda til að segja upp núgildandi kjarasamningum. Stjórn Samtaka atvinnulífsins kemur saman klukkan níu í kvöld til að ákveða næstu skref.

„Það er að miða í sumum málum og við skulum vona að það haldi áfram að fara í þessa átt og við getum ákveðið á stjórnarfundi í kvöld að við viljum framlengja samninginn. Eins og staðan er núna er þetta ekki í höfn," segir Vilhjálmur Egilsson, framkvæmdastjóri Samtaka atvinnulífsins.

Skrifstofa Alþýðusambandsins verður opinn í kvöld en þar ætla menn að bíða til miðnættis eftir ákvörðun stjórnar Samtaka atvinnulífsins. Verði kjarasamningum sagt upp koma fyrirhugaðar launahækkanir um næstu mánaðamót ekki til framkvæmda.

„Og þá verða lausir kjarasamningar á almenna markaðinum og öll okkar aðildarfélag þurf að setja að undirbúa gerð kjarasamninga og fara í viðræður við sína viðsemjendur," segir Gylfi Arnbjörnsson, forseti ASÍ.

Atvinnurekendur leggja mikla áherslu á ríkið beiti sér fyrir stóriðjuframkvæmdum en tillögur ríkisstjórnarinnar hingað til þykja ekki ganga nógu langt.

„Ef að það er ekki fjárfestingar í þeim mæli sem við erum að vonast til þá er engin glóra að taka þátt í svoleiðis ástandi," segir Vilhjálmur

„En það versta sem gæti komið fyrir er það að við förum í áframhaldandi kreppu, töku tvö á næsta ári," segir Vilhjálmur. „Annað hrun."

Verði kjarasamningum sagt upp er einnig ljóst að stöðugleikasáttmálinn er úr sögunni.

„Ég getum ekki setið að einhverju sáttarborði í ósátt við ríkisstjórnar og atvinnurekendur," segir Gylfi.